財爺吸水　加聲四起
古仔、發哥：苦了市民

在香港經濟持續低迷的時候，昨日財政司司長梁錦松公布的下年度財政預算案中，依然大幅增加多項稅收，演藝界的周潤發、古天樂和溫碧霞均認為只會令市民百上加斤。

財政司司長梁錦松昨日公布下年度財政預算案，為了彌補嚴重財赤，預算案大幅增加薪俸稅、機場稅和汽車首次登記稅等，對市民可謂百上加斤。不過預算案中亦有照顧香港電影業，政府準備成立五千萬元的「電影貸款保證基金」，幫助港電影工業解決融資問題。

「我唔會亂使錢」
不過古天樂認為這五千萬基金幫助有限，他昨在電話中說：「據我所知，要得到政府肯擔保借錢拍戲係好難，如果係商業片，部戲劇情又幫唔到旅遊業，要政府幫就唔容易，而且五千萬對投資電影工業嚟講，真係唔係一個大數目。」
對於財政預算案增加多項稅收，古仔認為只會苦了市民，他說：「𠵱家經濟咁差，普羅市民已經不斷俾人減人工，甚至俾人裁埋，咁嘅時勢重加稅，真係唔係咁好，我自己都唔會再亂使錢。」
而周潤發昨日在電話中說：「政府財赤咁厲害，當然佢都有佢哋嘅難處，所以加稅好難避免，但對普羅大眾同中產就慘啲，政府都應該照顧吓佢哋，𠵱家惟有寄望政府快啲有良策刺激經濟，嗰個投資移民嚟香港嘅政策，應該可以吸引到唔少外資入嚟嘅！」
剛從內地拍完廣告回港的溫碧霞，則認為增加汽車首次登記稅是不合理，她昨接受電話訪問時說：「𠵱家加成咁，真係幾過份，成份預算案可以話加聲四起，對一般小市民同中產嚟講真係唔多公平。」

喜政府助電影業
而陳可辛昨日在會展出席電影評論學會的頒獎典禮，他認為政府肯幫助電影業是件好事，雖然只是做擔保人角色，但只要電影人向銀行借錢拍戲是有借有還，以後向銀行借錢就方便得多。