自從舊年惠理基金公布，持有富士高實業（927）10%股權後，富士高股價係咁升，尤其係早排小型實力工業股當炒時，更一度炒上1.75元，近排股價雖然回落，但經紀黃話應該有力再上。
富士高噚日跌0.63%，收1.58元，但成交金額只得79.4萬元，似乎又真係少咗啲。
經紀黃同意小初所言，富士高成交唔夠係一個問題，但佢話除咗惠理基金之外，亦開始有其他基金留意富士高，如果多人捧場，唔排除股價再有異動。
據講有間歐資大行，將會在今個月中，幫富士高搞場投資者午餐會，雖然暫時唔知芬佬見完管理層會有乜嘢反應，但有歐資行青睞富士高，應該唔會長期都係乾炒牛河格局。
富士高舊年12月公布中期業績時，盈利較01年同期倒退9.9%，只得2290萬元，但經紀黃話有分析員估計，下半年盈利將帶動全年盈利上升，所以亦有證券行睇好。
慕容小初