香港同內地嘅關係愈嚟愈密切，近期有幾個新盤，準備到內地做路演吸引國內買家。內地發展商亦加以配合，希望加強兩地交流。昨日一批為數二十多人，來自武漢嘅發展商考察團，拉大隊先後參觀長實都會軒及畢架山一號嘅示範單位。
全團共有八家發展商代表，佢哋參觀示範單位後，其中一位投資部人員話，今次主要來港考察，發現香港同內地所做嘅示範單位，風格截然不同。考察團大概逗留咗一個鐘頭，臨走影番張大合照，見證「到此一遊」。
另外，長實昨日發表聲明指出，近期有內地報章報道，香港金銀庫有限公司及北京國郵驛龍公司，推出長實「合伙人」股票珍藏冊，並稱長實李嘉誠亦有收藏，長實聲明與該兩公司並無合作協議，李嘉誠本人亦沒有收藏該珍藏冊。
九龍站上蓋擎天半島，第一期話咁快就收樓。九倉話，上個禮拜發咗信通知業主攞鎖匙。個物業已賣咗成千伙，唔少業主都好心急想收樓，睇吓買咗嘅物業狀況。九倉昨向傳媒介紹現樓示範單位兼會所，其間就見到唔少業主前往辦理收樓手續。
通常收樓都好多瑣碎嘢要做，九倉就準備咗一份非常別致嘅收樓用戶手冊。表面睇以為係一個圓形禮盒，實質裏面係住戶收樓須知，收樓大使重會安排個容量巨大嘅手挽袋，等住戶放晒所有水龍頭等單位用料，夠晒細心。
買樓送禮漸見普遍，而豪宅新盤送出的禮物，自然要配合身份。今次美聯為畢架山一號複式單位買家，送高爾夫球課程，價值約一萬元，重特別請咗美國職業高爾夫球聯會教練劉日洪親身教授，但名額只得一個。買家學成之後，更可與劉師傅到擁有「18洞」嘅高球場較量球技。
劉師傅技術了得，即席傳授長實執行董事趙國雄一招半式，無論姿勢、力度都相當講究，所謂名師出高徒，只係學咗兩吓，老趙就成功打波入洞。
電盈薄扶林貝沙灣展開第二輪代理獎賞大計，由即日起至下星期四午夜十二點，成個市場只要促成三十八宗成交，成績第一名嘅代理行，就可以奪得四十二萬八嘅獎金，第二名有二十二萬八。
另外，個人方面亦有一定獎勵，其間成績最好嘅兩名代理，就可獲二十三萬八獎金，實行以重賞吸引代理，繼續催谷銷情。
發展商嘅宣傳活動亦毫不鬆懈，依然密密舉行，例如日前已表示下周二會舉行試酒會，繼續為樓盤造勢，實行雙管齊下。
豪宅新盤早排一輪衝刺，有錢佬投咗三四十億入豪宅市場，發展商開心之餘，做代理嘅亦都飲得杯落，因為佣金豬籠入水。
近排大小平貴新盤都搞頒獎，日日都見各大行嘅經紀輪流上鏡笑騎騎領獎。差唔多賣清光嘅何文田山1號，新地啱啱頒咗個「超水準表現大獎」，得主係利嘉閣。
蘭西
電郵地址：
