港府03-04年度大力加稅及加費，但財赤預算仍然高達700億元，真係唔知港府點樣說服外資相信在06-07年可以搞掂財赤問題，以及叫穆迪及標普唔降香港評級。
新建議中有一項相當妙，就係政府將慈善免稅額由應課稅款的10%增至25%。董建華政府民望咁低，唔排除納稅人寧願捐多啲錢而交少啲稅。
國泰（293）業績果然不負眾望，盈利勁升5倍，比《巴隆氏》封面故事預測增長4倍為高，而且管理層對前景極有信心，將擴充機隊。唔通香港航空業真係咁好景？
其實國泰全年營業額只上升10%左右，純利勁升主要係成本控制得宜，擴充機隊相信只係希望增加規模效益，加強競爭力，而非看好經濟前景。
科浪國際（2336）缺乏炒家維持秩序，股價果然再散，全日跌22.6%，報0.325元，成交仍有1112萬元。不過，黑客聽到話幕後人並非完全放棄，但既然有人忍唔住要出貨，所以先避其鋒，保留實力，待沽盤沽完後，再行收集並重組攻勢。
海油服務（2883）近期頻頻獲基金公司TheCapitalGroup增持，不過股價仍然反覆向下跌，半個月內累積下跌8.5%。Cookie話，據聞有歐資近排進行減持，換馬至炒石油股。美伊一旦開戰，伊拉克必停止輸出石油，即使戰事可速戰速決，點樣恢復供油亦係尷尬問題，可能有排搞。
阿虎