恒指再跌72點，藍籌榮辱得好明顯，太古系港機工程（044）盈利大增兼派高息，國泰（293）盤數靚，太古系股份硬淨，最難睇嘅係中移動（941），又跌70仙，收16.15元，成交增至51球，大增4倍，基金掟起貨嚟，非常無情。
中移動散落嚟，中移動Put輪跳上去，10大威水輪中，中移動Put輪着咗7件，交投金額最勁嘅係9611，去到22球，收24.3仙，升幅22%。隻輪今年5月到期，溢價3.6%，槓桿率6.6倍；其次9675，有10球金額易手，7月到期，溢價3.7%，槓桿率5.5倍。賭正股繼續跌，揀Put輪炒，最正路係呢兩件，但要小心，正股已經超賣，提防有技術性反彈，不利Put輪。
唔計杜指Call輪9461，散得最厲害嘅係中移動Call輪9563，由2仙落到1仙，4月11日到期，行使價18.50元，估計好難翻生。其次跌得勁嘅係華能Call輪9546，收24.6仙，散45%，多得正股（902）跌25仙帶挈。隻輪重有個幾星期玩，溢價2.2%，槓桿率26.8倍。賭呢件，要有心理準備，隨時幾十巴仙上落，因為正股俾啲基金舞上舞落，隨時幾毫子上落，呢個變化，代表輪價飛沙走石，同類輪9538，昨散31%，亦會跟住正股大上大落。
章盛