噚日財政司司長梁錦松公布預算案，樣樣稅加得就加，除咗取消汽車首次登記時設備裝置嘅免稅安排，又建議擴闊私家車稅階幅度，全部針對中、高檔車。立法會兩位商界有米一族，竟然有極端反應。李國寶牙痛咁聲，話已落訂嘅新款法拉利會暫時Hold住，唔運嚟香港；相反田北俊竟然話要多謝阿松。
田大少好風騷咁話，呢次同上年阿松加紅酒稅一樣，幫咗佢好大忙，因為自己有好多靚紅酒同靚車，一加稅，屋企嘅酒同車齊齊升值，不知幾Happy！
不過講到因為預算案同人大、政協兩會撞期，搞到要京港兩頭騰，田少就認真唔高興。田少身兼全國政協及自由黨黨魁，又係行會成員，前日喺北京參加兩會開幕，噚日朝早人已在港聽預算案，今日開埋二十三條立法草案委員會選正副主席，會趕夜機飛返北京，之後又飛返香港度周末，下個星期再返北京繼續開政協，計落至少要飛六七轉。
田少話晒身嬌肉貴，年年咁撞期法容乜易殘？唔怪得佢聲言要向特首反映，要求阿松下年開始，改變三月第一個星期三宣布預算嘅傳統，一係改二月，一係三月尾，否則好似今年咁，朱鎔基上午九點喺北京讀最後一份工作報告，香港下午兩點半又講預算，學田少話齋，「都唔知關注一國好，定關注兩制好？」重使問，梗係愛國緊要啦。
傳真︰2623-9278
電郵︰