煮飯唔叻講價叻
馮仁昭四圍超：蕭正楠$1,888蝴蝶蘭賀老闆牛一

噚日蕭正楠（Edwin）帶埋師弟陳驊、師妹王蓉為MusicNation唱片公司揸弗人李進慶祝生日。李進今日牛一，Edwin同兩個師弟師妹特別買咗盆佢最鍾意嘅蝴蝶蘭送畀佢，重親自下廚煮大餐，𠱁到李進好開心。
送蝴碟蘭畀李進有乜特別意思？王蓉話：「我記得李進講過好想擁有一個自己嘅栽花場，於是我就提議送花，佢哋話本來想喺內地帶啲稀有品種嘅蘭花畀李進，但驚過唔到海關，所以惟有喺香港買。Edwin同陳驊就落力同花店老闆講價，最後盆蝴蝶蘭以賀壽價$1888成交。」

同李敏消夜醫肚
噚晚蕭正楠等人去咗李進屋企煮飯仔，齊齊整李進最鍾意嘅壽司、咕嚕肉同蒸魚，成班人雞手鴨腳，餸菜嘅味道當然好極有限，所以李進食完飯之後，再同老婆李敏去消夜醫肚，而李進嘅生日願望係希望Edwin佢哋三個今年嘅歌唱事業，可以更上一層樓。

華仔想學星爺放笑彈
劉德華日前接受英國CNN《亞洲名人聊天室》訪問，佢話覺得做喜劇最有挑戰性，重話覺得周星馳呢十年嘅成績有目共睹，佢自己都想成為一個可以令到觀眾笑嘅藝人。華仔話周潤發對佢影響最大，佢第一次見發哥嗰陣，發哥叫佢睇吓佢手上嘅勞力士手表，重同華仔講，只要勤力啲做嘢，佢都可以擁有呢款表喎。

張佩金太瘦唔啱打拳
張佩金（前名張鎧潼）噚日到尖沙嘴拜拳師陳德興做師傅，佢話有意學楊紫瓊咁做打女喎，佢又覺得學打拳好有型，所以就專登拜師學藝。不過前日張佩金試踢沙包時唔小心整傷，陳師傅話因為張佩金太瘦，所以叫佢增肥，佢重話安排咗張佩金同師姐張文慈擇日對打一場。陳師傅又透露關之琳同男友黃家諾遲啲都會一齊拍拖學拳。

君如反口唔結婚
吳君如噚日去台灣宣傳電影《金雞》，佢出席呢套戲嘅香港首映禮時，特登着咗件好性感嘅裙出嚟，套戲喺香港嘅票房大收，所以君如去到台灣就唔使咁搏，着番套春裝亮相，佢話要還佢秀麗嘅真面目喎。
君如之前話如果自己同埋陳可辛、杜汶澤及田蕊妮一齊攞金像獎就結婚，但佢𠵱家又話唔急住生仔，而且陳可辛都走唔甩，所以結唔結婚已經唔重要喎。