港府聲言07年要減財赤，未來幾年，加稅減開支，人人都已有晒心理準備。阿松講預算案，加加減減，成套計劃，但能否在07年成功減財赤，相信佢亦同香港市民一樣唔知道。
受外圍拖累，噚日港股繼續下跌，恒指最低9059（好在未穿上次9030嘅低位），午市初段曾有過反彈，但阿松一講到加稅，特別係利得稅加1.5個百分點（比預期為大）時，市勢又再掉頭向下，好在尾市上番，恒指收市9109，跌72點，總算仍能守在9100之上。不過，9100已遭受到好多次考驗，守唔守得住，愈來愈令人冇信心。
上升股（不計認股證）有百二隻，信德集團（242）升破2.0元阻力，高收2.05元，升勢再起，今次目標指向2.3元。冠軍科技（092）高收1.15元，走勢亦現突破，可以止賺位繼續持有。
噚日個市雖然下跌，但有兩隻單日轉向嘅股票可以留意，一係華豐環保（364），另一係萬友消防（8201）。
華豐由近期高位0.75元回落，到噚日低見0.62元後反彈，高收0.66元，逆市而升1仙，單日轉向，調整應已完成，短期阻力在10日線（0.68元）水平，破位則可再挑戰前高位0.75元。市場有消息，謂華豐今個月中會在歐美進行路演，基金若上車，股價當可再創新高。
萬友上個禮拜由0.33元急升破0.4元才出現調整，噚日低見0.365元之後反彈上0.385元收，同樣係單日轉向，且成交比前日大增兩倍，動力好強，一旦衝破前高位0.405元阻力，照度上去，起碼可見0.48元。
唔好睇萬友嘅冧巴係8字頭，佢嘅盈利表現好過好多主板公司。萬友主要在內地經營消防業務，係少數能集消防系統設計、製造及施工安裝服務供應商於一身的公司，01年，營業額和盈利都有逾倍增長，02年首9個月，已獲利9527萬元人民幣，較前同期上升54.28%，估計全年盈利1.26億元人民幣，每股攤薄計盈利7港仙，PE僅5.5倍，集團並聲言會派息30%，以每股派2.1仙計，息率5.4厘。PE低息高，揸得過，好大機會上番上市價0.4元之上。
郭兆誠