豐田代理以迅雷不及掩耳嘅手法，將於今個周末推出全新凌志版RX300，佢哋咁做唔止嚇咗班水貨車商一跳，而且亦備受各家汽車代理注目。當中，又以本田代理至為緊張，皆因早前亞Mark收到風，話佢哋正部署引入Acura品牌嘅全新MDX七人SUV，以抗衡凌志RX300獨大嘅局面嘛！呢部本來屬意北美市場作主打嘅MDX，由於近期廠方決意回流日本，響本土設立生產線，既然有右軚版型號，自不然佢哋就會考慮埋其他亞洲區嘅分銷啦！據知呢部造型好有北美Feel嘅MDX，會用上較RX300更強嘅3.5公升V6偈，有260匹馬力輸出之餘，佢重備有三排七座位豪華配搭，以及一套較CR-V所用嘅RealTime4WD，更高級嘅VTM4四驅裝置，即係話日常以二輪驅動，有需要才用上四驅喎！若然一切順利的話，相信呢款Acura版嘅MDX四驅SUV，可望於5月下旬抵埗都唔定㗎！.