李鵬飛同中聯辦近排咁多恩恩怨怨，導火線當然係早前佢參選人大，疑被中聯辦封殺。不過飛哥喺新一期《茶杯》月刊就大爆早喺中聯辦前身嘅新華社時期，佢老哥已經唔多討當時嘅社長許家屯歡心，皆因飛哥「並非事事都聽社長支笛」。
飛哥重爆許家屯初到貴境時，唔了解香港嘅法治精神，有次許嘅助理竟然搵飛哥，想佢為一位被廉署起訴嘅愛國富商向港督說項。飛哥當然冇插手，嗰位商人亦冇坐監，因為患咗老人癡呆症囉！
飛哥又憶及另一位社長助理喬宗淮，竟然睇唔明邀請卡上嘅「BlackTie」（即打煲呔着禮服），結果着到好似去喪禮咁去派對。喬宗淮父親喬冠華當年係出名嘅大才子，估唔到中國封閉幾十年，連大才子嘅兒子都搞成咁唔清楚，後嚟已故張鑑泉私下送咗一套禮服畀佢，真係苦心。
傳真︰2623-9278
電郵︰