郭晉安及容祖兒昨午到中環拍攝《美麗在望》外景戲，為配合劇情，安仔以中年發福大肚腩造型現身，引來途人圍觀。雖然安仔變成「大肥佬」，但仍受不少師奶fans歡迎，拍攝期間不時被圍着索取簽名。
郭晉安、容祖兒（Joey）、盧海鵬和鍾麗淇等，昨日在中環拍攝無綫新劇《美麗在望》外景戲，安仔更以「大肚腩」造型現身。穿起恤衫西裝的他，正面看來沒有甚麼異樣，但側面看肚腩顯然易見，連Joey亦不禁要伸手摸一番。
安仔笑說：「套劇講我最後會放縱自己，搞到有個啤酒肚，相信呢個肚勁過《戇夫成龍》阿旺嗰個，其他人都話我似大肚。我喺呢套劇入面都幾大突破，因為做一個奸人，重要眾叛親離，最後有報應，會禿頭兼有大肚腩。」下月安仔會到美國登台，他自言不擔心因伊拉克局勢緊張而會有危險。
此外，早前謝霆鋒於成都參拜後，將於本月十三日復出，對此Joey說：「佢吸晒靈氣，相信已充滿力量。呢排我冇搵佢，加上我拍劇好忙，好似斷六親。」稍後霆鋒與Joey還會合作，她說：「佢應該會作首歌畀我，因為佢曾經應承過。公司話遲啲我哋兩個會合作，但唔知會做啲乜，我會熱切期待。」
而近日Joey除了忙於拍劇外，還要分別拍攝兩個廣告，難怪她曾被目睹在拍攝時打呵欠，而且不時倦得要隨處瞓，她說：「有時拍得攰想休息，如果保母車泊得遠，我都會隨街瞓，點知噚日瞓咗一陣後，起身時發現眼腫咗，好似搽咗eyeshadow！」
採訪、攝影：王連連
