港股叻咗1日，又試跌番。滙豐（005）同恒生（011）兩盤數其實算靚，大市就係唔領情。等啲大行分析過後，出報告，大概會推介兩隻銀行股，股價亦有機會做番好啲。不過，正如近日所講，買佢哋嘅Call輪要計埋除息因素，免得過等除息後至諗，暫時咪手多多。
龍虎榜上最威水嘅係杜指Put輪9465，由2.4仙殺上4.4仙，暴升83%，有3球半易手。前晚杜指雖然下跌，但唔足以令9465有咁勁嘅升幅。隻輪行使價杜指7600，半個月後夠鐘，杜指到時唔低過7600（現時7838），隻輪就飲雪水，呢件9465博唔過。
另1件杜指Put輪9685，昨成43萬份，收31.5仙，升26%，9月到期，大把時間，值博率較9465高好多，但好少成交，嘥氣。
和黃（013）前日升80仙，昨日跌1.10元，跌突。啲和黃Put輪跑晒出嚟，9544升83%，下禮拜夠鐘，現價18.3仙，溢價0.5%，槓桿率25.4倍。隻輪行使價48元，正股若回升1.8元以上，隻輪作廢；正股若再跌2元，隻輪就可以再升1倍。和黃個零星期內再有2元變化唔奇，9544冇晒或者升1倍亦都唔奇，賭呢隻Put輪，一定要細細注兼且可以受得起刺激。
章盛