小初2月頭打波時，聽班大經紀提過，話有班大陸客想炒起華瀚生物製藥（587），講咗成個月都冇動靜，噚日先至見有真正開車迹象，突破晒所有阻力位，創上市以來新高。
華瀚噚日升5.75%，收0.92元，成交股數有成3600萬股，成交金額3200萬元。不過，其中有2000萬股造0.88元，唔係自動對盤。
經紀陳話，據講呢批貨已落入強者之手，由於股份已經完成轉倉，估計快將開車。小初則有啲疑惑，近期藥業股龍頭中國製藥（1093），喺2元水平已經企咗一段時間，但仍然冇乜突破。究竟藥業股重有冇概念炒多轉呢？
經紀陳話，炒股呢類活動，只要有錢就有得玩，如果班大陸客水源夠，股價唔會炒唔起。
另外，上市前講到係威係勢嘅科浪（2336），上市首日險守招股價，但第二日已經不支倒地，重要低於招股價16%收市，收0.42元，實在令小初大跌眼鏡。
慕容小初