寫股票專欄最大嘅噩夢，就係所推介嘅股票「見光死」，噚日科浪（2336）如此表現，趙飛雲認真唔好意思，自己輸錢事少，若累讀者輸錢就事大，希望跟上車嘅讀者，能夠嚴守提供嘅47仙止蝕位，損失不致擴大，本身則在46仙沽出計數。
趙飛雲以往推介股仔，除聽消息外亦會睇埋技術走勢是否對辦，今次新股科浪計落基本因素唔差，噚日股價表現明顯與基本因素不符。有消息話幕後唔齊心，有人搶閘出貨。姑勿論內裏原因為何，炒股票，特別係股仔，必須定下止蝕位及嚴格執行。至於科浪後市點睇？老實講，趙飛雲唔識睇，但既然無緣亦無謂再糾纏，諗過另外一隻好過。
港股周一突然挾淡，恒指大升146點，但當晚倫敦港股已率先回吐，加埋美股杜指下跌53點，港股噚日亦出現回吐，恒指跌86點，收9181。
港股前日升得多，噚日跌得少，走勢算硬淨。美林及摩根大通調低滙豐（005）及恒生（011）03及04年度盈利預測，幅度大約5-10%，對兩股未有太大影響，滙豐跌1元，收84元，恒生跌1.25元，收84.75元。
過往大戶喺呢段時間嘅玩法，通常係買滙豐及恒生正股及沽期指，收完息後掟正股，收割期指。去年恒指3月上旬升，下旬跌，今年成歷史重演。滙豐及恒生分別在3月19日及3月17日除息，可能係Put輪上車好時機。
趙飛雲