2003年嘅一級方程式格蘭披治賽事，將會喺星期日（3月9日）於澳洲墨爾本開鑼。今年法拉利會唔會被麥拿侖平治或者威廉士寶馬追上，可謂言之尚早；但筆者卻希望大家早啲認識嘅，會係今季賽例有大幅度修改，目的係一來要搞好F1嘅「可觀性」，令F1呢個「Showbiz」變得更有戲味，二來係FIA所謂要令玩F1嘅成本下降，務求令細車隊都可以繼續玩落去。
今回率先同大家講嘅，係星期五（3月7日）開始嘅每場排位賽；今年起，每位車手只能用一個圈去決定排位圈速時間，即係話，從Pit開車，返來起/終點線就即刻喺呢個圈計時，再駛到起/終點線，呢個圈完成，計時完畢，再跑返Pit。係快係慢，絕對係一圈定英雄。喺賽事舉行前嘅周末，星期五將有一節排位賽，呢個時間成績決定星期六另一節排位賽嘅先後次序，然後再由星期六嘅成績決定排位次序。然而，2003年嘅F1賽例重有多處地方修改，下回繼續再同大家講吓！
文：陳自齊