新聞主任協會年年都會搞大聚餐，新舊同僚及友好都歡迎參加，今年聚會上周五喺銅鑼灣警官俱樂部舉行，筵開十八席，十分熱鬧。
八方聽聞，今次出席嘅新聞處前處長最多，計有張敏儀、陳祖澤、丘李賜恩、而現任一把手蔡瑩璧、特首辦主任林煥光同埋眾人媽打李麗娟都有到，十分畀面。
見到張大姐，大家梗係關心佢嘅近況，究竟最後花落誰家？點知大姐都好坦白，話自己暫時未有落腳之所，咁各位大老闆收到啦，大姐重未定去向。
至於丘太，一早已經有傳聞，佢會同楊啟彥共同進退，即係話，年底佢阿姐正式退休。數嚟數去，嗰晚只係見唔到曹廣榮同陳鎮源，原來兩人都唔得閒。陳鎮源係因為公事而去唔到呢個派對，佢俾老董調咗去漁農處做處長，睇住啲雞鵝鴨，咁啱嗰晚係正月廿八，佢要同豬農團拜聚餐，所以分身不下。肥陳咁勤力，老董應該有啲表示啦，不過𠵱家打政府工，同以前又不可同日而語。
當晚除咗有得食，重有獎抽，林煥光抽中超級市場禮券，佢個手下就抽到神秘禮品，都唔錯吖。
傳真︰2623-9278
電郵︰