時代廣場對面剛開了一間新的麵店，店名很陌生，倒是元朗居民可能聽過這家麵店。「嫲辣粉」的店名很有心思，乍看店名，還以為老闆寫錯字，對着那個露出慈祥笑容、梳了個髻的老婆婆招牌看，才明白了幾分。店裏賣的正是老闆毛先生的嫲嫲的家鄉麵食，嫲嫲自製麻辣醬又很棒，加起來便是嫲辣粉了。
記者：邵超
攝影：楊錦文
新開業的關係，門口放着許多還未凋謝的鮮花，赫然看到古天樂敬贈的花牌，當下好奇問毛先生，原來是拍檔認識他，唔知有冇機會見到真人呢？喺元朗總店吃過的人，可能以為走進同名不同老闆的店子，因為格局真係唔同晒，不過大家一見玻璃櫃上放着的一樽樽印有嫲嫲肖像的醬料，應該很有親切感。
嫲嫲不是甚麼大廚，只是一個可能人人家裏都有的一個活寶貝。在毛先生的記憶中，小時候一家人常常吃嫲嫲弄的家鄉雞湯米，每次都可以連湯整碗吃掉，因為湯底是真材實料的老火湯。
「𠵱家舖頭用嘅湯底係參考嫲嫲煲嘅湯。老火雞湯加埋淮山、杞子、伏神、黨參和雞殼等煲幾個鐘，好香㗎！」在家裏煮個麵的湯底也花這麼多心思，可見嫲嫲手有多巧，不過嫲嫲萬萬沒有想到，多年以後，屋企人決定把她的家鄉麵食捧出來給其他人吃。
「嫲嫲擔心過屋企人鍾意食，但唔知街外人嘅口味，大家商量過，覺得嫲嫲嘅家鄉味道好有特色，可以試吓。」令毛先生有信心的，除了嫲嫲弄的雞湯米真的好味道外，還有嫲嫲秘製的麻辣醬。
嫲嫲是四川瀘州人，毛先生從小吃嫲嫲的麻辣醬大，練得一身吃辣的本領：「細個當然怕辣唔肯食，但當你每日見到枱上都放咗樽麻辣醬，不知不覺間就會加啲醬落麵度。」店裏枱上放有麻辣醬，打開蓋看到色澤和發出的香味，不期然想放多匙。
在元朗開第一家店時，嫲嫲自製的麻辣醬當然不能再行家庭作業，要投廠生產，用料更加講究。「我哋直接去批發市場買靚料，批發市場嘅貨都係啱啱由農民手上買嚟，保證新鮮。」
材料用最靚，又有嫲嫲的秘方，毛先生很有信心把醬入樽放賣，他說無加防腐劑，只要油足夠，開封後放上一個月也沒有問題。不少客人吃過麵後，會順帶買一樽回家。毛先生有意遷就港人口味，麻辣醬不像家裏吃的那麼辣，以香、麻為主，辣反為其次，客人有些嫌辣，也有些嫌唔夠辣，正如店裏賣的是大大碗的粉麵，也有人說不夠吃，真係見仁見智。
聽毛先生的口吻，好像很內行，不像第一次搞生意。原來毛先生揸鑊鏟已經七年，吸收外邊餐廳運作經驗，決定自己開餐廳。打工跟做老闆不同，所以第一間分店係家庭式經營，普通麵檔格局，又怕只賣雞湯麵不夠多元化，把自家拿手的滷物放進餐牌裏，又特別找來香港少見的滑粉。不夠兩年，因為有朋友的鼓勵，合資在銅鑼灣開設第二間分店，裝修也着意格調高一點。
細心留意，嫲辣粉門口分左右，左邊門頂掛上印有嫲嫲肖像的光管招牌，右邊門頂則掛上木製的牌匾，新舊並立，頗有特色。現時舊舖由毛爸爸管理，新舖則由毛先生打理，開店一星期，反應不俗。這份喜樂原想跟嫲嫲分享，不過嫲嫲已搬回鄉跟大伯同住。
「開新店時大家都好忙，怕無時間照顧嫲嫲，一個老人家留喺屋企太危險，就交畀大伯照顧，佢已經八十幾歲，好應該享吓清福。」
看到嫲嫲的肖像笑得多慈祥，來這裏吃麵總覺得特別溫暖。
半肥瘦腩滷水入味
毛先生最拿手炮製滷水食物，這個五花腩有肥有瘦，是他的至愛。唔少女士都好鍾意，只係她們要keepFit，只會食少少肥肉位，但最緊要點埋枱上的麻辣醬、雜錦菜或野山椒，酸、麻、辣都有，勁惹味！
老火湯再加藥材
加入藥材的老火雞湯，伴以鮮雞肉和鮮冬菇，食落零舍不同，好雞人士必定愛上這種鮮味。
薯粉做麵好煙韌
滑粉係用薯粉做的麵，北方人好鍾意食，咬落去煙韌得嚟有啲爽，如果色澤白啲，都幾似水晶粉。這個四拼麵份量很多，其中脹卜卜的蠔仔一望就知新鮮，咬落去有那種海鮮的鮮味。
炸粉用毛氏秘方
蠔仔新鮮，即使炸過一樣咁掂，毛先生唔肯公開炸粉的秘方，惟有靠食多啲試多啲，睇吓估唔估到啦！
嫲辣粉
地址：銅鑼灣羅素街2-4號2000年廣場地下5-6號舖
電話：25748181
營業時間：9:30am-11:30pm