飲茶時候，碰到外滙C，面色紅潤，氣色甚佳，睇怕都係呢排搵到夠矣。外滙C做咗十幾年銀行，最近十零年轉行做外滙經紀，搵散客炒外滙，搵咗唔少經紀佣，近月外滙波動劇烈，黃金急升急跌，係搵銀好時機也。
外滙C咪咪嘴笑：「我哋係搵錢多過股票經紀，佢哋怕死得七七八八咯，我哋佣金幾好㗎，嗌價差額十點子，每張合約（澳元合約等於十萬美元，日圓合約等於一千二百萬日圓）收二三百蚊，約莫係七點子，加埋接近二十點子，黃金差唔多每日上落十蚊美金（每安士），澳元、紐紙上落一百點閒閒地，我哋生意幾好做！」
幫銀行買賣外滙，差價甚大，幫外滙C做，頂多畀二十點，確係幾吸引。不過炒滙風險甚大，要千萬小心，揸住十萬銀開戶，揸、空一張合約好嘞，千祈唔好同佢搏命。
外滙C日日收佣金收唔切，自不然到處吃喝，但佢講到飲食，就皺眉頭。外滙C話：「近來好多間富豪高價、有名氣嘅酒家都退晒步，食物質素差晒唔在講，相熟部長都黑口黑面，冇晒服務，恐怕係經濟陰乾之下，老細難頂，猛咁cut人工、裁員，所以廚房樓面都冇晒工作興趣之故，長此以往，好驚香港人冇晒士氣，如曼城眨吓眼就輸三比零，任由阿仙奴魚肉咁樣，垂手待斃！」
唉，董特首主持渣打馬拉松啟步禮都俾人噓餐懵，由佢做領隊，啲球員確實好難有士氣。