當一個藝人紅咗，所有關於佢嘅私生活秘聞，無論係𠵱家發生定係陳年舊事，都一樣有新聞價值，好似上年被傳搭上日本富婆叶恭子嘅當紅小生窪塚洋介，就俾新一期《Flash》雜誌刊登咗佢八年前做緊日劇閒角嗰陣，同一個女仔拍拖嘅私人照片，連佢哋兩個大被同眠嘅相都公開埋，睇怕窪塚今次俾朋友出賣咗囉。
據悉，有位自稱係窪塚高中同學嘅二五仔向雜誌爆料，話現年二十三歲嘅窪塚，八年前重喺日劇《金田一少年事件簿》入面做大閒角嗰陣，同一位讀另一間高中嘅女仔拍拖，個二五仔重話當年讀緊高中二年班、得十五歲嘅窪塚已經好識揀，個女仔曾經喺學校獲選為校花㗎。
聽講窪塚同呢位靚女一個禮拜約會兩三次，有時一齊去吓遊樂場玩，佢哋嗰張大被同眠嘅相，原來係喺朋友屋企影嘅。雖然兩個人恩愛到瞓埋一齊，但聽聞佢哋周不時會嗌交，最後窪塚發現對方唔多專一，所以呢段情喺一年後已經結束。