重賞之下，必有勇夫。薄扶林貝沙灣由上個禮拜二起，至噚晚七點半，特別加設獎金獎勵計劃，畀開最多單嘅代理行，同埋開最多單、最大金額嘅經紀。貝沙灣喺過去一周，做成七十宗買賣，經紀有獎金攞，固然開心，而發展商電盈使多少少錢，就可以短期內去咁多貨，更加飲得杯落。
電盈顏金施頒獎畀各得獎經紀後話，會再舉行類似獎金獎勵計劃，但樓盤嘅銷售策略則未有太大改動。樓盤將提供新嘅優惠，由即日起，每一位成功介紹親友購買貝沙灣嘅業主，可以得到屋苑會所二十萬積分，可免費享用會所各項設施，月中又會舉行試酒會。
至於兩個成功攞到二十三萬八千蚊獎金嘅經紀，分別係促成五宗交易、單位總值接近七千九百萬蚊、最高銷售金額獎嘅美聯黎敏萍，同埋一次過簽成十宗買賣嘅香港置業陳國榮，亦係促成最多宗數嘅經紀。
美聯及中原亦分別得到四十八萬八獎金，因為兩家代理行開最多單。
現代人生活愈來愈現代化，事事講求快捷方便，但就製造唔少廢物，對大自然環境做成傷害。尤其人口密集嘅市區，要呼吸一口清新空氣，實在係奢侈嘅要求。
太古地產致力推動環保，近日為樓盤逸樺園展開推廣活動之餘，不忘講吓環保意識。為鼓勵市民瀏覽樓盤專用網頁，了解物業資料之餘又灌輸環保，凡瀏覽該網站，太古地產均會捐出港幣10元予世界自然基金會，作推動環保之用。
該網站喺
𠵱家潮流興講數據，所以意見調查就愈嚟愈多。中原地產話佢哋未來會做多啲調查，但唔係搵前線員工去問啲客，而係透過互聯網。
聽講，佢哋已經預備好今日政府公布財政預算案之後，即刻喺網上做意見調查，睇吓網民嘅反應。答案有根有據，自然有說服力。睇嚟，代理行透過互聯網做調查會成為趨勢。網上做調查，重可以慳番好多人力物力。
恒基深水埗嘉裕居送旅遊優惠促銷，今次揀咗南非為目的地。銷售代理中原，執行董事陳永傑喺記者會重出動私伙道具，包括白老虎一隻，同牛仔帽一頂，與南非野生動物園嘅主題十分配合。
陳永傑話，隻老虎原來係喺較早前啟德嘉年華會，用幾十蚊掟番嚟。頂牛仔帽重巴閉，係佢去南非旅行時，喺當地比林斯堡野生動物保護區購買，係正中嘅南非來路貨。
物業管理工作繁瑣，而管理員係前線人員，同住客最多接觸，尤其遇到有拗撬，脾氣差啲都唔得，重要做到攞獎就更加令人佩服。
新地旗下啟勝管理，啱啱攞咗「2002年屯門區最佳保安員選舉」十個獎項中嘅五個，得獎員工包括盧炳枝、徐道明、丁衛東、曾燕安同埋張玉環，當中有私人屋苑，亦有停車場保安員。比賽由屯門區撲滅罪行委員會舉辦，由屯門多個屋苑推舉，經過初步遴選，重要面試評審，十足選港姐一樣。
蘭西
電郵地址：
