立法會議員周梁淑怡以前喺電視界叱咤風雲，又曾任消委會主席、行政、立法會議員、旅發局主席，但呢位女強人噚日接受路訊通新節目《龐愛蘭會客室》訪問，講講吓流露感性一面，話身為領導者好似成日高高在上，其實都幾寂寞。不過做得領導者就要付出代價，周梁亦認同無我精神係成為領袖嘅必要條件。
周梁年輕時已經好清楚自己未來嘅路向：「我最鍾意表演藝術，一對住文件就頭暈，所以一定唔做得律師。」讀英國文學，原來係貪其可以演莎士比亞劇，過吓舞台癮。
講到仔女經，周梁成個生晒，強調自己對仔女好民主，民主到有時自己都嬲：「我先係阿媽喎。」咁會唔會過兩招親子之道畀財爺梁錦松？周梁即刻耍手擰頭，話呢啲要父母自己體會。
想聽周梁同范徐麗泰、何秀蘭、陳丹蕾等十二位知名女性嘅各種心得，由三月十七日開始坐巴士，就有機會欣賞到。
（圖）周梁淑怡（右）成為路訊通《龐愛蘭會客室》首位嘉賓，將於巴士屏幕上大談女性成功秘訣。
傳真︰2623-9278
電郵︰