某女歌手雖然生得唔靚，但勝在聽教聽話，所以深得公司愛錫。但女歌手唔知係咪聽話到過咗龍呢？老闆叫佢陪廣告商唱K又好，叫佢陪埋上房過夜又好，佢都永遠唔會SayNo！所以就算近年佢嘅聲勢有下滑迹象，但佢間唱片公司都冇話離棄佢，依然繼續撐住佢。
之不過早排女歌手犧牲都幾大，佢奉命到酒店陪某商家開心，點知個商家竟然玩到冇嘢玩，連塞乒乓波都玩埋，開心完之後，個乒乓波就塞咗喺女歌星下體入面，結果要去某港島私家醫院搵醫生幫女歌星攞番個波出嚟。
搞掂之後，女歌星就如常做嘢，好似冇發生過事咁，我馮仁昭都要寫個服字畀佢，女歌星咁鬼專業，唔怪得咁襟撈啦！
新疆巴楚縣上個禮拜發生六點八級大地震，黎明日前就以「聯合國兒童基金會青年特使」身份去咗嗰度探訪。噚日上午黎明去到新疆巴楚伽師地震受災最嚴重嘅地區瓊庫恰克鄉，探望帳篷內嘅小學生，佢代表聯合國兒童基金會香港委員會向新疆地震災區捐咗二百萬港幣，而佢出力之餘亦出錢，自己掏腰包捐贈咗價值十萬元嘅物資畀災區，果然係身體力行。
滕麗名同馬德鐘噚日去咗香港仔參觀靈芝廠，馮仁昭都跟埋去睇。因為間靈芝廠要求絕對清潔，所以要着防塵衫先可以入去。滕麗名話估唔到𠵱家中藥保健產品生產過程都咁專業，有機會都要試呢隻產品。唔講唔知，原來呢間廠嘅其中一位老闆係嫁咗去日本嘅歌星陳美齡嘅姐姐陳曦齡。
張鎧潼噚日喺新城做訪問，話題係講狗，但係估唔倒佢養狗都有咁多趣事，佢話：「我大大話話都養過十幾隻狗，我最鍾意就係醜樣狗。以前我有隻狗好鹹濕，見人就死纏住隻腳，重有一隻狗，好核突，就係佢鍾意食屎，將佢屙出嚟嘅全部食晒，真真正正係一隻食屎狗。」
鄭裕玲（嘟嘟姐）噚日喺商台接受梁芷珊嘅節目《點芷一個人》訪問，佢話自己早前去咗拉斯維加斯登台，發覺呢個世界真係好細，喺嗰邊撞到好多圈中人，但出現喺身邊嘅居然唔係平日公開嘅另一半，總之就有好多對都係咁，都唔知幾多意外驚喜。但係嘟嘟就死都唔肯開名，話驚惹來殺身之禍咁話！
養和眼科名醫、李嘉欣前緋聞男友張叔銘早前被拍得同梁雪湄約會食飯，噚日張叔銘出席灣仔Zyoptix激光矯視手術記招，馮仁昭問佢係唔係同梁雪湄拍拖？佢一聽就笑唔停，春風滿臉咁話：「唔答得你喎，sorry，冇嘢講！」問係唔係女方想保持低調？張叔銘又話：「都唔講得，真係唔得。」
