中國國家隊新任教練阿里漢，上個月帶國家隊第一場波就主場以○比○賽和世界冠軍巴西，前日佢同中國隊一齊俾亞洲足協選為二月最佳；而國內傳媒之前重猛話中國隊呢場波表現出色，又製造咗唔少機會，搞到全世界以為中國隊打得好好。但其實阿里漢同中國隊係因為亞洲足協冇乜選擇至當選。
我求大俠現場睇過場波，就覺得大部份巴西球星都係當遊埠踢呢場無謂友賽，所以賽果並唔反映兩隊實力差距；而睇番二月份亞洲區其實冇乜賽事，只得中國隊有打國際賽，另外亞冠聯亦未開始，所以球迷千祈唔好興奮過度。另外，如果中國隊踢一場咁嘅波都當選，香港隊喺東亞盃預賽無敵，會唔會喺下月有份呢？
有時黑起上嚟，真係想反底都幾難，好似新特蘭咁，睇番佢哋上場作客對富咸嘅比賽精華，全場佔優，但三番四次施射都過門不入，最後重要畀沙夏攻陷，三分全失；有入波能力嘅中場主將麥肯又喺呢場波攞咗今屆第十面黃牌，咁啱得咁蹺，要喺護級生死戰，對保頓及韋斯咸停賽，唉！睇怕呢隊波都係「九降格」。
我求大俠總覺得基瑾偏愛前鋒多於後衞，剛剛佢又宣布準備放棄守將R鄧尼及賀維；但係以六百萬鎊加盟，連一個波都未入過嘅科拿，就連鬧都未鬧過。不過佢對兩年前畀堅尼踢傷嘅夏蘭特，就畀多四個月時間佢接受療程，睇吓好唔得番，先至決定佢嘅前途，算有人情味囉。
相比新特蘭，另一支中型班修咸頓就老定得多，佢哋領隊史特根重晒命咁話，如果冇咗比亞堤，我哋嘅位置會同西布朗一樣；冇錯，比亞堤今屆喺聯賽入咗十八球，比最接近嘅隊友多出十五球，名副其實單天保至尊，不過史特根咁講，會唔會打擊其他隊員嘅士氣呀？門將尼美同全能老倌迪森夠打得好啦！
去夜總會可以挽救失落心情？定係借酒澆愁？相信答案可以問一問柏林哈化嘅巴西前鋒馬些連奴，事緣佢老哥畀球會發現，喺佢哋近排輸畀博維斯塔同漢堡○比一後，都出現喺同一間柏林開嘅夜總會消遣，要接受球會懲罰；近五仗冇波入嘅馬些連奴，因住下屆冇得留低。