除了韓式按摩外，早前的敷薑足浴亦演化成敷薑按摩，將2斤薑碎敷上身感覺的確幾特別。聽老闆張先生講，敷薑能行氣活血，消除疲勞，對肩周炎、濕關節、關節扭傷等特別有幫助，而且效果重係即時可見。「好多人都鍾意敷薑按摩，我哋平均每日都要用起碼200斤薑先得，而且啲薑係連皮一齊用，重要每日朝早打碎，保證新鮮。」
收費：?50兩小時
敷薑按摩最特別是按摩的中途會敷上薑碎，按摩師會問你邊度覺得痛，然後對準位置先敷。按摩師話最多人肩膊、腰部有問題，所以好多時都會敷這兩個部位，不過亦有人膝頭、髖骨等出現問題，要求敷這些部份。當敷薑時，按摩師會替冇敷薑的位置按摩，唔會浪費一分一秒。
敷上薑後，按摩師用熱毛巾蒸焗，加速生薑滲透入皮膚，達至祛風除濕的效果。初初敷上薑時，感覺唔係太強烈，不過當熱氣滲透時，皮膚會覺得㷫㷫哋，跟住呢種㷫的感覺就變得更加強烈，我敷了20分鐘已大叫救命，要求按摩師抹去薑碎。按摩師話敷薑最長可敷30分鐘，若敷時覺得唔太舒服就要叫停，如所敷的位置有傷口亦不宜敷薑，否則會加重傷口的傷勢。
㷫完背脊後，按摩師便會推油，按摩背部，除了一般的BB油外，店內還使用香薰按摩油，味道清香，可紓緩㷫烚烚的感覺，呢個步驟就最舒服。
本地人阿娥：「我鍾意這裏的敷薑足浴，雖然敷薑時會覺得好㷫、好辣，不過敷完後就好舒服。而我自己本身鍾意搵男技師，覺得男人有力，按摩都會舒服啲。」
美健足浴按摩中心
地址：深圳東門立新路鴻基工藝城二樓
電話：（86）75582293806
營業時間：9:15am-2:00am
交通：於羅湖火車站乘的士約需?13。