八方去年底寫過，三月五日，即係今日，日值歲破，諸事不宜。噚日喺新世界海景酒店同大公關午飯，提到梁錦松嘅第二份預算案，忽見窗外漫天風雨，維港一片迷茫。
大公關話今晚好得閒，因為冇馬跑。馬會求財若渴，唔跑馬令人費解；但大公關話佢哋應該冇咁醒，睇埋通勝始安排賽期。
八方就覺得巧合得幾好，人多聚集，加完稅又輸錢，好易失控。
今日個預算案，按事前放風手法睇，未必有傳聞咁衰，但整個政府做事嘅手法，已令人不再有任何期望。個別以往值得尊重嘅官員，如楊永強同林鄭月娥，亦加入倒行逆施行列，噚日讀《信報》林行止嘅評論，實在講出好多人嘅心聲。至於一群話今晚有人衝擊7.8，又話大戶借定港元沽空之所謂「政府權威消息人士」，其行徑只反映呢班人為求達到目的，乜都做得出而已；有呢類人掌權，重慘過加稅。
傳真︰2623-9278
電郵︰