剛於上個月正式抵港嘅豐田新Prado，令唔少圈內外人士大感意外，事關今勻代理引入新車嘅時間，只較進口水貨車商相距不過兩個月左右；其次，新車有別東瀛本土版，因其配備有更強嘅4.0公升V6偈，重有齊電子液氣壓避震同FullOption車廂設備，但售價卻跟水貨商入口嘅3.4公升版本Prado，僅相差數萬元，你話班水貨車商係咪嚇咗一跳吖！之不過，亞Mark聽聞嚟緊豐田代理，會響今個周末周日推出凌志版嘅新款RX300，相信又會再一次令班水貨車商愕然；皆因同出一轍嘅日本版Harrier剛面世，就連一向反應迅速嘅水貨車商都未及到車，但代理就經已有車抵埗噃！加上事先張揚，於上個周末陸續有傳媒收到代理首展嘅邀請信，相信今趟RX300嘅登場，佢哋終於贏番漂亮嘅一仗喇！惟影響所及又豈止一般水貨車商呢！事關重打亂咗某大代理引入新車嘅大計嘛！