趙飛雲其實一直提住玩恒指Put輪要昅住滙控（005），由於前幾日睇咗一份大行唱淡滙控嘅報告，警戒性降低，結果噚日倉內嘅恒指Put輪9587要損手，雖然趙飛雲嚴守紀律，恒指升穿9230即沽出9587止蝕，但都要輸7%，似乎真係同9587唔多夾，玩親都損手。恒指昨升146點，收9268，重上20日線之上收市。
科浪（2336）首日掛牌，走勢相當反覆，但抽中新股者，噚日要在53至55仙水平食胡應該唔難，趙飛雲早前推介讀者認購，叫做有交代，但自己則怕填表冇認購新股習慣，尾市喺50仙買咗20萬股，價錢同認購新股一樣，但可能就要稍等炒第2轉，估計唔使等好耐，初步目標價57-60仙，跌穿47仙止蝕。
科浪嘅業務模式較其他純半導體分銷商具競爭力，可以按客戶要求度身訂做半導體及提供電子整套裝置方案。集團未來將主力拓展電訊、資訊及衞星定位器材的電子整套裝置服務，有關業務發展潛力大，邊際利潤高，為未來提供高增長動力。據聞集團03年接單情況理想，業務會有高增長，以現價往績PE5.6倍計，股價上升潛力頗大。
經紀老友報料，話江山控股（295）快將復牌，幕後出現人事變動，新人事會有新作風。據聞有大馬客斟緊入股，復牌後可留意。老友可能見趙飛雲鍾意炒輪愛冒險，所以介紹埋呢類高回報高風險嘅股仔。
趙飛雲