恒基為旗下新盤提供新春優惠圓滿結束，賣樓成績揭盅嘅同時，亦係各代理行派成績表嘅時候，銷售大獎由中原奪得。雖然已經過咗農曆新年，但喺都要好意頭，噚日嘅獎項命名為「生意興隆大獎」，獎盃都特別靚。恒基先前都頒發過「一馬當先大獎」，同埋「馬到功成大獎」，簡直係新春祝福語大串燒。
中原就話，恒基旗下新春利是盤，總共售出超過二百伙，中原就佔咗超過一百間，佔有率逾五成，主要包括大角嘴港灣豪庭、北角御皇臺同埋紅磡半島豪庭。
頒獎禮揀咗個好特別嘅地方舉行，就喺位於銅鑼灣，剛於去年底開張嘅「TowngasAvenue」，恒基張炳強話，要趁機幫呢間新開張嘅食肆賣吓廣告，其實TowngasAvenue喺尖沙嘴都有分店，之前重借畀歌星陳慧琳拍攝特備節目。
電盈上個禮拜二搞咗個貝沙灣銷售比賽，一個星期內促成最多成交嘅兩家代理，各獲四十八萬八元額外獎賞。本來比賽至噚日中午十二點結束，發展商下午就會頒獎，兼夜晚食餐好嘅。不過，噚日下晝突然話比賽延至今日截止。
原因係有兩家代理行嘅成績叮噹馬頭，未能分出勝負，兩家行爭得面紅耳赤，所以電盈畀多六個鐘頭，等佢哋分出勝負。未到最後一刻，真喺未知鹿死誰手。
聽講呢兩家代理係「母子」公司，估計係中原同利嘉閣。而另一家代號係黃色嘅代理，則一直領先，相信可穩奪冠軍。
香港人買樓，除咗考慮經濟能力，好多時都會諗埋風水問題。深圳羅湖市中心新盤金色都滙嘅發展商，就以風水術數招徠，請咗香港風水師鄭國強實地勘察，佢話個盤坐落罕見風水旺地，有利住客咁話。
香港好多樓盤都試過搵出名嘅風水師解吓畫，反應都唔錯，但係蘭西就認為，風水呢樣嘢，信則有，不信則無。
策劃經理包賢權就話，都係想買家買得安心啫，個盤嘅質素先至最重要，項目合共提供九百二十個單位，面積三百幾至七百呎左右，首批一百個，呎價六百幾蚊起，送埋裝修，個盤最快月中可以推出。
鴻運地產早排清盤結業，龍頭大行之一嘅美聯物業，主席黃建業就話過對呢間公司品牌有興趣。
不過，噚日佢哋跑馬地分行開幕時，佢就話由於臨時清盤人有好多手續要辦理，所以公司現時仍在開會商討有關鴻運嘅事，收購與否，未有定案。
不過，美聯先後吸納咗鴻運前線同後勤三十幾名員工，其中兩成係以前鴻運主管級人馬，後勤就有公關大臣黃偉燕。美聯嘅生產力自然如虎添翼。
此話何解？事關喺全港擁有四十多個商場同舖位項目嘅信和，三個負責物業租務嘅高層，身高都過六呎，如果合組籃球隊，對手見到定會腳震震。
噚日信和置業新上任集團總經理梁世華第一次同蘭西見面，出席嘅包括租務總經理陳昌傑、租務助理總經理黃日山，三人都十分高大，令在場其他人顯得特別矮細。佢哋除咗身形高之外，工作經驗同樣豐富，好似梁世華太平紳士，佢喺政府部門服務超過三十年，相信憑藉這份經驗，可協助集團進一步拓展業務。
蘭西
電郵地址：
