美伊局勢好似有緩和迹象，伊拉克「自願」銷毀導彈設備求和，令到美元轉強，加上市場憧憬滙控（005）業績有15至20%升幅，港股一度升破9300水平，全日升146點，收市報9268，成交金額73.15億元。不過，黑客聽到大戶重係以淡倉為主，雖然外圍傳出好消息，大戶仍未有平期指淡倉意思，相信與周三公布財政預算案後，港元可能被狙擊的傳聞有關。
今次預算案針無兩頭利，無論預算案做成點，大戶都可以在市場未消化預算案所帶來嘅影響前狙擊港元。兩大評級機構穆迪及標普對預算案所作嘅言論相當重要，希望阿松可以壓得住兩間機構把口，至少唔好畀佢哋在港股開市期間發表敏感性言論，免得股民又被殺個措手不及。
周三才公布業績嘅國泰（293）噚日已率先起飛，全日勁升5%，收報11.45元。主要受到美國權威雜誌《巴隆氏》周刊以封面形式對國泰盈利作出樂觀預測，去年盈利料增逾4倍，並睇好國泰遠景。
東方魅力（198）近日由0.018元反彈至噚日0.047元收市，累積升幅達1.6倍。有消息話，公司將入股國內一間娛樂公司，並為此而考慮配股集資。據聞有心人會在東魅配股前，將股價至少踼上0.10元水平，即係上升空間重有成倍咁多。Cookie話，東魅貨乾，就算要踢上0.20元亦並非難事，但問題係踢高咗之後，邊個會抵得諗接貨？
麗展（488）提出以每股0.28元將豐德麗（571）私有化，消息公布之後至今，好似除咗阿虎之外，聽唔到有其他小股東投訴收購價偏低，要求麗展加價的聲音，以及表示對私有化投反對票。豐德麗一直企在0.27元水平，未曾試過升至0.28元或以上水平，唔通班小股東真係為求套現乜都冇所謂？
阿 虎