香港經濟唔好，好多人都去深圳吃喝玩樂兼消費，喺深圳其實有好多筍嘢買，好似我認識嘅港人李太，得閒無事就最鍾意去深圳行超市，除咗貪超市面積大，可消磨一個下午外，另一主要原因就係入面所賣嘅嘢的確幾抵，李太見我唔係太信，就帶我去超市行番轉，我見到平日用開嗰隻洗衣粉同牙刷平足香港一半，搞到我一袋二袋咁離開超市，下次真係要帶定戰車去掃貨先得。
記者：歐嘉荃
攝影：陳良、韋信
李太經驗談
身為家庭主婦的李太，最愛逛超市，對於深圳各大超市都有唔同嘅意見。「我最鍾意去『百佳』，佢啲進口貨最多，價錢算中等；『好又多』多數賣本地貨，我就覺得麻麻哋；至於『萬佳』同『Wal-mart』就夠大，貨品種類齊，價錢點都比香港平。」
未入超市前，我已經做定功課問李太邊款產品最抵，佢居然話全部都咁抵買，搞到我唔知佢講真定講笑！不過入去見到我平日用開嘅潔霸洗衣粉，真係平過香港一半有多。呢隻洗衣粉屬無磷配方，具強力的殺菌功效，我覺得幾好用，不過我最鍾意都係佢陣陣嘅清新花香味，着上身重香噴噴。
容量：1.5kg
香港價：約$36.5
深圳價：?17.5
（萬佳）
李太推介
「好多時喺深圳買嘅洗衣粉，質地都較為粗，洗起上嚟無咁多泡，不過呢隻就唔同，洗出嚟嘅衫都幾乾淨，質地都幾幼滑，價錢平香港好多，幾抵用。」
一到春天，昆蟲又開始活動，買定殺蟲水就有備無患，我覺得呢度啲殺蟲水價錢都幾平，就好似拜高殺蟲水，以香港一半嘅價錢就買到。除咗殺蟲水外，同牌子嘅滅蚊噴霧，價錢都係一樣，每樣買一支，加埋都平過香港買一支殺蟲水，難怪之前已經聽過好多港太話行超市必掃殺蟲水啦！
容量：600ml
香港價：約$42.9
深圳價：?20.9
（好又多）
講到至抵用品，我一定推介早晚都用嘅牙刷，喺香港買支牙刷無十五、六蚊都落唔到樓，呢度以四分一嘅價錢就買到支牙刷，你話抵唔抵！我所講嘅就係高露潔嘅適齒波浪型牙刷，刷毛依據牙齒形狀設計，能緊貼牙肉，刷得舒服，又慳唔少錢。
香港價：約$19.9
深圳價：?5.8
（萬佳）
「深圳嘅洗潔精選擇唔算多，但價錢算平，好似我用開嘅斧頭牌洗潔精，每支差唔多平香港$4，有時呢度賣特惠孖裝都只係?27，我覺得買返香港用都幾值得。」李太坦言有時會買定幾支返香港慢慢用。
容量：1.3kg
香港價：約$18.9
深圳價：?14.9
（百佳）
作為家庭主婦嘅李太，除了留意家品外，糧油雜貨都唔會忽略，講到李太的心水，佢即刻推介刀嘜花生油。「喺香港我都係用刀嘜，貪佢有陣清香的花生味，而且煮出來的食物又特別香口好味，有時轉用其他牌子的生油，我老公都食得出。」
容量：2000ml
香港價：約$51.8
深圳價：?27.5
（萬佳）
雖然我唔係家庭主婦，不過我都係一位「食米知價」的人，就好似豉油，我對佢嘅價錢絕對瞭如指掌，因為我本身好鍾意豉油撈飯，但我一定要用味道甜甜哋嘅蒸魚豉油，所以我特別留意蒸魚豉油嘅價錢，計計數，一支同份量嘅豉油平過香港一半有多，即使香港超市減價都要賣$10，咁嘅價錢絕對抵！
容量：410ml
香港價：約$14.2
深圳價：?6.9
（萬佳）
糧油是家庭主婦的主攻貨品，之前喺聯檢大樓已見唔少師奶攞住生抽豉油過關，嗰時心諗：「使唔使連豉油都帶返香港呀？」但當我同李太行超市時，發覺真係好平，半價買到一支李錦記蠔油，呢個價錢喺香港只可以買到支普通豉油！
容量：510g
香港價：約$14.5
深圳價：?7.5
（萬佳）
李太個女同我一樣都係Qoo迷，我哋最鍾意就係飲Qoo的白提子汁，不過喺深圳我就未見過白提子汁，有啲失望，但好彩佢嘅價錢可以彌補，每支售?2.9，差唔多係香港嘅四折，既然咁平，就連蘋果、橙同桃汁都唔放過。
容量：350ml
香港價：約$6.8
深圳價：?2.9
（好又多）
我最鍾意食零食，每次見到朱古力都情不自禁，點都要買包食，而深圳所賣的朱古力又真係好吸引，就好似M&M's，牛奶同花生朱古力都只不過?3一包。
容量：45g
香港價：約$5.8
深圳價：?3
（百佳）
喺深圳連狗糧都平過人，好似寶路，就差唔多有七折，而且每包都係細細包嘅100g，畀小狗食就最啱，一次一袋份量啱啱好，味道有牛肉、雞、牛肉蔬菜、雞肉蔬菜等，選擇夠晒多。
容量：100g
香港價：約$4.5
深圳價：?3.3
（百佳）
＊以上產品的最後價格，以該店公布為準。
萬佳百貨
地址：深圳市羅湖區春風路2021號長豐苑
電話：(86)75582367220
百佳超級廣場
地址：深圳東門太陽廣場負1層
電話：(86)75582393704
好又多
地址：深圳八卦二路旭輝花園A1-A2首層
電話：(86)75582496210