最近置地集團宣佈業績，虧損甚大，分析師Eric去聽過背景介紹，明白置地點解要擴建置地廣場嘅商場樓面。Eric話：「置地解釋，佢哋嘅寫字樓出租率雖然受壓，租金亦受壓，但遮打道九號嘅商場生意非常好。Armani開張之後（好似係去年九月），唔使兩個月，已經賣清存貨。外來遊客，特別係內地遊客啲購買力好勁！既然太子大廈商場一早裝修好，遮打道九號入伙，𠵱家裝修緊歷山大廈商場，一俟完成，置地廣場就會大改特改，目的只有一個，就係擴闊商舖樓面，容納名店。」
內地遊客多，帶旺名店，冇錯係一個大好處；但因為咁，連置地廣場都要「變酸」，實在令人失望。現在遊客生意非常好，機場店舖最近招標，名店爭崩頭：聽講屈臣氏奇兵突出，搶咗萬寧個舖位，置地雖然失咗萬寧，但旗下另一間零售店（7-11）就bid贏CircleK（利豐集團）。利豐主席馮國經就係機管局主席，主席都冇面畀，你話機管局幾公道呢，馮主席值得尊敬。
銅鑼灣地鐵站一帶，書報攤多咗過期鹹書（色情刊物），據大記者所知，呢啲書係斷斤秤咁買番嚟嘅，平到癲；賣得出去，賺到笑。邊個買呀？大記者問過報販，答案就係內地遊客，當然係男性！遊客咁多，過期鹹書好好賣，非獨Armani為然也。