瘋狂迷偶像嘅「追星族」，香港興叫「瘋狂fans」，而日本就通常會叫呢啲狂迷做「OIKAKEFAN」。其實迷偶像唔係後生仔女嘅專利，計我羅拉話，要做到真正嘅狂迷，絕對要有番咁上下錢，事關唔係個個都可以買大堆禮物送畀車太賢隻狗，或者出寫真集捧日本太子妃㗎！
追星年資：4年
絕招：冧偶像隻狗
香港人識「韓國陳奕迅」車太賢，都可能係因為《我的野蠻女友》，但係呢位田村小姐四年前已經對車太賢一見鍾情，佢為偶像整咗個日文網頁，又專程飛去韓國，最絕嘅係田村小姐不停咁買嘢送畀車太賢隻狗，佢話：「一般歌迷都係送嘢畀車太賢本人，我專係送畀佢隻狗，所以佢咪記得我囉！我隻狗都係叫車太賢㗎！」
追星年資：20年
絕招：出評論講偶像
咪睇呢位中坑落合先生嘅中島美雪收藏品得啲CD同poster冇乜特別，原來佢係一位好有文采嘅老師，已經寫過六本關於中島嘅書，重有資料文本同評論文章㖭！但係佢原來一次都未見過中島，佢話：「我要嘅話大把機會，我唔想同佢嘅關係由fans變朋友嘛！」
追星年資：38年
絕招：去英國學英文
呢位廣田太太鍾意咗奇里夫李察（CliffRichard）三十八年咁耐，佢為咗同偶像溝通，由零開始跑去英國學英文，重直接去奇里夫李察嘅事務所交涉，攞許可權出咗幾本免費嘅書，叫做《追星師奶到倫敦》。咁長情，連我羅拉都好感動！
追星年資：11年
絕招：利用囝囝
呢個fans小林太太都算狠，為咗見日本太子妃雅子，竟然次次都將BB放喺身邊嘅當眼位置，佢話：「太子妃好鍾意細路，有BB喺度，佢會好自然咁望過嚟，我咪可以影到好多正面相囉！」佢加加埋埋都影咗成三萬幾張相，重幫太子妃同公主愛子出咗兩本寫真集，問你服未！