如果大家記性好的話，應該重記得早前我哋「Mark哥有料到」一欄，曾提及寶馬香港代理開始接受訂購730Li嘅Order，據聞反應重唔錯㖭！雖然唔少車迷都未見過部車嘅真身，但唔緊要，因為廠方將會響今屆日內瓦車展上，正式展出呢款備受矚目嘅新車。被譽為係寶馬7系最新入門版嘅730i/730Li豪華轎車，係以一台曾獲獎無數嘅3.0公升直6引擎作動力核心，響Bi-VANOS技術輔助下，馬力及扭力輸出分別為231ps/5900rpm及30.6kgm/3500rpm；匹配一套6前速Steptronic半自動波箱，由靜止起步加速至100km/h，需時僅為8.1秒（730Li為8.3秒），而極速更可高達237km/h。車廂方面，全新730i及730Li型號與其他7系房車一樣以豪華舒適見稱，除前後兩排座椅用上高級真皮鑲嵌，令乘坐舒適度倍增外，設備配搭亦見齊全易用呢！
另外，廠方亦會響車展會場上，展出以全新SportsPackage包裝嘅7系房車（見圖）㖭！當中最吸引嘅會係新車改用上一套跑車化懸掛，令車子頭輪及後輪離地距降低20mm同10mm，配合19吋胎軨連245/45R19（前輪）及275/40R19（後輪）高性能輪胎，望落極富跑味外，重可以有出眾嘅路面循迹性呢！車內亦有不少改動，如改換跑車軚環、前排跑車座椅等等，從而令你有置身於高性能豪華房跑車之感呢！有興趣嘅朋友，就要留意佢哋嘅到港日期喇！