昨日兩隻新股百靈達（2326）同埋科浪國際（2336）掛牌，表現的確令小初有啲失望，小初原本以為第一日掛牌，點都有10%執，點知情況唔係咁理想，百靈達高過招股價0.03元，收0.73元，科浪只險守招股價0.50元，但成交就一如幕後炒家嘅作風，大到你唔信。
靚女經紀堅持話百靈達仍未炒完，叫小初拭目以待。小初只係雞仔注，陪睇戲一定冇問題。
經紀陳叫小初留意一隻創業板股份，叫做萬友消防（8201），呢隻股近兩個月以來，成交大咗好多，隨時有會開車。
萬友消防舊年9月底，以每股0.40元招股，上市以來一直低於招股價，但怪就怪在近期接連有外資大行出報告唱好，似乎有料到。
經紀陳話，其實數下手指都知道係乜嘢事，隻股就快上市滿6個月，公司有兩大策略性投資者，合共揸咗3.2億股，就快解涷沽得，所以家陣做定市場推廣工作，搞旺個場引人注意，方便日後出貨。
慕容小初