甘於做大後備嘅皇馬英格蘭中場麥馬拿文，唔知係咪得閒冇嘢做，成日吼住隊友球星啲波衫同踢過嘅波，隨時若干年後或者因為呢啲嘢而可以搵一筆！
話說上個禮拜六西甲聯，朗拿度首次替皇馬大演帽子戲法，賽後忙到冇問球證攞番個波，老麥就話朗拿度你應該攞番，等佢可以叫其他隊友喺個波上面簽晒名，畀番哨牙度留念咁話。
但我求大俠就懷疑，老麥會唔會別有用心咁攞咗個波就算數，將來拎住個波話係哨牙度入三粒嗰個，奇貨可居。
其實早排聽講過老麥好鍾意問隊友攞波衫收藏，而且好不幸重俾人偷咗去，搞到佢冇晒心機。唔怪得佢又向哨牙度個波打主意啦！
你話費格遜怒踢碧咸唔啱咩，我哋中國甲A球隊青島頤中嘅南韓教練李章洙重激，日前喺一場中國足協盃賽事後，李教練又喺更衣室大罵班波表現差，講兩講重扯住其中一個球員頭髮，再兜巴星佢後腦！我求大俠唔知嗰個球員係邊個，但據講佢哋嘅國腳曲波，就成日傳同球會及教練不和，會唔會係佢呢？
德國門將簡演活「現代陳世美」單料，原來重有餘波，有報道話有球迷睇唔過眼簡尼咁負心，向佢發出咗死亡恐嚇。不過人哋做唔做負心漢，係咪真係要激動到殺咗佢呢？我求大俠覺得可能係德國失業問題嚴重，啲人冇嘢做就搵啲咁嘅嘢玩。總之，呢次就益咗一向唔妥德國佬嘅英國傳媒，喺彼岸大做文章嘞！
成日話「年紀大、機器壞」，就算好似波神佐敦咁犀利，都好難違背呢個自然定律；睇吓噚日巫師對住熱火場波，波神只係射二十七中九，重有兩球AirBall就知喇。大佬，成四十歲人，但係由二月開始，佢重要每場平均打成四十一點二分鐘，而𠵱家上陣時間最多嘅艾華遜都係每場打四十二分鐘咋，再係咁落去真係油盡燈枯都有之。
76人最近成為東岸炙手可熱嘅球隊，主將艾華遜功不可沒。不過噚日對住「魚腩」金塊，佢唔知係唔係有啲貪勝不知輸，成場波俾人吹咗四次持球撞人，重要射失咗十一球之多。可能布朗教練諗住之後連場硬仗，所以由得艾華遜第四節中段就犯滿離場，等佢抖吓好過；但係76人嘅支持者就眼白白睇住佢哋贏波輸盤。