林嘉欣同鄭伊健呢排喺香港拍緊星皓部新戲《戀之風景》，嘉欣早排去青島取景時帶咗五部相機周圍影，不過今次佢用嚟影相嘅唔係傳統相機，佢係用Nokia嘅3650手機影相，因呢部手機背面設有鏡頭，所以可以隨時影相都得，呢款機呢排都幾受注目，因早幾日有一個男子就係攞住呢種手機偷拍女人裙底。
林嘉欣雖然都有攞住部機周圍影，但佢當然唔會偷影人哋裙底，只不過係吼住伊健瞓着覺就影吓佢嘅睡相，伊健見佢影得咁過癮，忍唔住問佢攞部電話嚟睇，當伊健睇到自己嘅睡相俾人影低咗時，佢都忍唔住笑，後尾佢都有攞呢部機影番嘉欣報復！
日本AV女優小沢圓𠵱家喺台灣進行緊佢五日四夜嘅寫真拍攝工作，噚日佢喺乳山故壘嘅軍事設施展示場着咗性感嘅迷彩裝影相，身材仍然保持得好弗。今次去台灣，小沢圓重會參與公益活動同埋做金門觀光嘅代言。
溫兆倫噚日返清水灣電視城拍《怪俠一枝梅》，因為佢最近又俾前妻追債，所以記者問佢係唔係真係爭人錢冇得還，佢話：「我有供樓，不過，我同銀行啲債務問題，唔關其他人事，我毋須要同人解釋咁多。」講完之後，佢就開始鬧人成日作嘢寫臭佢，重鬧埋香港政府，佢話：「香港有言論自由，就可以隨便採訪，栢芝報警做得好。我哋都有交稅，董建華知唔知我哋做緊乜。」
周星馳同寰宇老闆林小明單官司未了，早兩日星爺已經話唔好再將佢個名同林小明擺埋一齊，之不過答應咗幫寰宇開戲嘅張衞健就話星爺公司都有搵佢拍嘢，但馮仁昭同星爺公司啲人了解過，知道佢公司根本都冇傾過健仔拍嘢，擺明有人喺度搵星爺過橋，聽聞星爺睇到呢單新聞都得啖笑，懶得澄清，唔想幫人做宣傳。
李克勤噚日去港台做訪問，講起佢下個月同譚詠麟再開演唱會，今次都會有一場日場，重話諗過開子夜場，佢話：「紅館過咗十一點九就會每分鐘計錢，太貴喇！所以最後都打消念頭。」訪問時主持人提議克勤喺個唱嘅棟篤笑環節以張栢芝同陳小春同遊泰國推油做題材，克勤就話：「都得喎！叫埋小春嚟睇囉！等我之後打畀栢芝叫佢提供資料先。」
