失驚無神，港股抽高近百五點，市場憧憬滙控（005）同恒生（011）宣布佳績兼派高息，係升市１大原因。
市後滙恒宣布業績，均在預期之內。滙控派末期息0.325美元，約合2.535港元；恒生則派末期息2.8元，另加派特別股息0.5元，合共3.3元。
受正股帶動，滙恒Call輪表現唔錯，威水輪頭兩位，由滙控輪9545同9558包辦。9545下月1日到期，溢價唔夠1%，槓桿率102倍；9558本月底屆滿，溢價0.5%，槓桿率88.5倍。
呢兩件末日輪，溢價表面接近平水，但計及正股派高息，「實際」溢價唔止咁少，因為正股派高息，揸Call輪冇息收也。
假設滙控昨日收市價85元，已預先反映派息2.535元，而且股價喺3月尾除息時會作出相應調整，則9545嘅「實際」溢價就唔係0.98%，而係4.1%。同樣道理，9558嘅「實際」溢價唔係0.5%，而係3.6%。以末日輪計，如此溢價唔算便宜。
恒生Call輪亦然，以成交最旺嘅9654為例，表面溢價4.4%，槓桿率29.7倍，7月尾到期，數據幾靚。但計及除息因素後，9654嘅「實際」溢價去到8.7%，又唔係咁吸引。𠵱家買滙恒Call輪，唔可以單睇表面溢價，重要參考埋「實際」溢價，總之一句講晒，高追冇着數。
章 盛