「廿二世紀殺人網絡」(Matrix)今年來勢洶洶，五月就會上演續集，我羅新基都係Fans嚟㗎，不過點都估唔到手機都會同呢套戲扯上關係，原來三星特別為《Matrix》推出特別版手機，不過外形話時話似鬚刨就多過似手機，而且都只係得圖片，手機規格係點都重係好神秘，睇嚟都係《Matrix》DieHardFans先買得落手咯。
雖然好多人都係用緊GSM手機，不過CDMA始終都有一班捧場客，不過最近就有個朋友向羅新基訴苦水，話CDMA喺幾個大商場都收唔到，拎住部C401S去到日本又用唔到漫遊，谷鬼氣就打電話上CS投訴，點知個CS重叫佢轉番GSM，Trade-In部機補一千蚊就有部Nokia6610，唔通橙台對CDMA無心戀戰，有客投訴就叫佢用番GSM算數？
我有個朋友學人響應潮流，走去玩手機影相，不過佢就唔係用內置鏡頭手機，而係買咗隻可以影相嘅Handsfree，起初都玩得好開心，之後就好鬼勞氣走嚟同羅新基講，話影完啲相唔可以Transfer返去電腦，只可以Save喺部機度，打去Hotline問原來先知係正常嘅。其實又點止Handsfree相機唔得，插鏡頭又好，內置鏡頭又好，啲相要儲落電腦都唔係咁方便，一般都係手機互send，有發電郵功能嘅就可以「貓」出去用電腦收，或者有部份手機可以加配件同軟件連接電腦，所以話手機影相呢家玩意，重大有改善空間。