北京召開兩會前夕，有關人事變動嘅消息滿天飛，不過中國政治變幻莫測，一日未揭盅，一日都重有變數。八方就收到一單同香港傳媒有切身關係嘅堅料，話前外交部發言人沈國放，由聯合國調回北京，入咗中央黨校受訓後，將會出任外交部部長助理，專責安排對外新聞發放事宜。
如果屬實，香港記者一定好開心，因為沈國放以前喺外交部主持記者會，香港記者最捧場發問，大家可謂熟朋友。日後領導人外訪由沈生安排訪問，港記實有着數。
另一個消息，我哋嘅特首應較緊張。吳儀接替錢其琛專責港澳事務嘅講法已經講咗好耐，最近又傳中央想分拆港澳事務，由中央辦公廳主任王剛接掌。係人都知阿董嘅後台係錢其琛，錢老卸任，朱總換屆，日後搵邊個撐阿董？除非係老江啦，否則佢真係分分鐘被降為「黨委書記」。
阿董有排煩，不過李嘉誠大仔李澤鉅哋就喜上眉梢，噚日政協預備會通過三百二十五人嘅主席團成員名單，有十五個港區政協上榜，小超人、郭炳湘、吳光正、梁振英、劉漢銓，重有最近言論出位嘅陳永棋同何柱國等新貴，都有份入主席團，加埋澳門政協何鴻燊，睇嚟佢哋全部都做梗政協常委。
兩會咁多新聞，又係朱總離任前最後一次表演，點少得因朱總賞識一炮而紅嘅鳳凰衛視記者吳小莉？佢唔只提早銷產假上京，重會每朝八點半客串新城電台嘅《兩會傳真》，同大家報吓新聞背後嘅花絮。
（圖）吳小莉生完女即再戰江湖訪兩會，重「秘撈」埋新城電台。
傳真︰2623-9278
電郵︰