滙豐銀行亞太主席艾爾敦，一向都係權力核心，無論係公益金又或者係滙豐都係。不過噚日舉行嘅「新界區百萬行」，艾爾敦竟然俾人排出咗核心圈，原來係黎明哥哥啲Fans太厲害。
話說噚日嘅百萬行喺沙田馬場起步，主禮台佔於馬場差不多最尾位置，各嘉賓喺主禮台剪綵後行到起步點，都要行好幾百米。大會為咗保護班嘉賓，於是就用條繩圍住啲嘉賓，記者就喺繩圈出面，似乎幾好計。點知殺出一班勁熱情嘅紅衫隊伍──黎明嘅Fans，佢哋全係咁圍住個圈，令到個圈時長時短，連原本同黎明傾緊偈嘅艾大班都頂唔順，要走出個核心圈唞唞氣，遠離班癡情Fans慢慢行，唔使迫得咁辛苦嘛。
（圖）黎明（右）同滙豐大班艾爾敦，噚日齊齊行百萬行。
程志遠攝
傳真︰2623-9278
電郵︰