中環最繁盛地段嘅甲級寫字樓，幾乎全部係置地集團擁有，置地當然係怡和（俗稱渣甸）控制嘅。置地最近宣佈業績，上一個財政年度虧損八億二千五百萬美元，內含非經常性嘅物業估值撥備八億五千萬美元，唔計物業價值下調嘅話，都係賺得二千五百萬美元，兩億港紙都唔夠，與長實、新地比較，差天共地。
三十年前置地叱咤風雲，係香港地產嘅龍頭大哥，竟然搞到咁嘅田地，可見管理手法差到極，買佢股票者為之眼冤。所謂人窮思舊債，公司窮就想用盡祖宗家產。置地廣場落成咁多年，因為商場設計好，噴水池與陽光相輝映，成為中環地標，我哋喺入邊行，好舒服，亦可以對外國遊客講：「置地廣場具世界水準。」
唉，估唔到置地突然話要擴建商場面積，喺噴水池上面，加建兩層零售樓面，可能設一家百貨公司。大家可以想像吓，將來置地廣場商場啲高度感、空間感、陽光，全部冇晒，置地廣場商場變成一個好普通、好香港嘅擠逼搶錢商場，中環唯一比較elegant嘅地方都會消失咯。
就算你係小股東，都反對無效，我哋外人更加冇得𠵱牙鬆摃。英國人以前重有在搶錢與美觀中間取得平衡，現在就索性全部為錢，因為香港已經回歸中國，中環變成個貓樣，佢哋都冇感覺。香港要做國際城市，又退後一大步。