靚女經紀早排曾品題過兩隻新股，一隻係賣水煲等小型家電嘅百靈達（2326），另一隻係半導體及開發電子整套裝置方案嘅科浪國際（2336），今日一齊掛牌。
小初問靚女點睇？佢話兩股各有千秋，總括而言，有貨見好就收，冇貨低位收集。靚女咁講，似乎好空泛喎。
靚女解釋話，百靈達公開招股部份超額13.4倍，配售部份都超額3.7倍。由於招股情況踴躍，所以估計有唔少貨源流咗出街，因此有幸分到貨者，最好見好即收。
由於估計有關人等會在低位收貨，所以亦唔怕跟埋一齊收集，等佢哋玩第二轉。
至於科浪，雖然配股成績冇百靈達咁激，但配售部份有2.9倍認購，公開發售亦有4.1倍認購。過往幕後炒家嘅作風，通常會將成交搞到大一大，但升幅就唔太勁，所以有貨在手，不妨見好先收割，低位再收集。
慕容小初