上周五，恒生（011）叻過大市，等今日派成績表。恒生02年上半年盈利微降2.9%，盤全年數相信都唔會有乜驚喜，不過此時市場利率低垂，高息吸引股民。
恒生若派3元股息，股價料會升多些少，短線對恒生Call輪有啲刺激，但刺激作用唔大，因為恒生例牌3月底前除息，到時股價下調，Call輪溢價又高番啲。唯一可博嘅恒生Call輪係9654，現價28仙，7月底到期，溢價5.2%，槓桿率30.4倍。但計埋恒生月底前除息2.80至3元因素，溢價實際係9%，槓桿率係29.5倍，唔算得特別吸引，宜短炒而唔適宜長揸。
公司派高息，對正股股價有利，Call輪亦得益，但除息後股價相應下調，令Call輪溢價升高，所以Call輪亦唔係着數晒。炒高息正股Call輪嘅，要考慮埋呢個因素。
滙豐（005）亦係今日派成績表，估計派末期息2.54港元，對股價亦會有少少刺激，例牌3月底前除息。滙豐Call輪9725比較適合玩短線，8月夠鐘，現價49仙，溢價5.3%，槓桿率17倍，計埋正股除息因素，溢價實際係7.3%，槓桿率係16.5倍，又係唔算得特別吸引。
章盛