男子組合Shine兩位成員現年十九歲，日前拍攝新歌《半成年》MV時，特別穿上「我半」和「成年」字樣的外套，在鏡頭前手舞足蹈，弄得一身大汗，不讓表情多多的Boy’Z專美。
二人男子組合Shine最近接拍了Motorola手提電話廣告，日前兩位成員黃又南和徐天佑便在中環半山一唐樓的單位內，為該廣告的主題曲《半成年》拍攝MV。又南和天佑為配合歌曲，以及表達正值十九歲乃介乎成年之間，特地分別穿上印有「我半」和「成年」字樣的外套來拍攝。
Shine在拍攝時，導演笑稱請二人發癲，讓他們在鏡頭前自由發揮，結果二人便擘大口狂嗌兼手舞足蹈，亂跳亂叫，弄得一身大汗，而在場工作人員見狀，亦不禁笑得彎腰。
其實Shine鬼馬的一面確是不讓古靈精怪的Boy’Z專美，對於外界將兩隊男子組合比較，Shine只笑說：「比較就唔緊要，啲人係唔係都攞嚟比㗎啦。嗰時啲人連我哋兩個都攞嚟比一餐，邊個隻髀粗啲都要比，但最緊要係良性，鬥就唔好囉，好老土㗎，況且我哋都識嘅，大家跟同一個老師學唱歌㖭。」
此外，又南憑電影《一碌蔗》及《香港有個荷里活》獲下月舉行的金像獎提名「最佳新演員」，又南表示提名已令他心情緊張，他說：「係幾緊張㗎，雖然有啲人話我有兩部戲角逐同一個獎會分薄票數，但我都有七、八成信心。
「我第一部戲就俾陳果捉咗去拍《荷里活》，我睇番其實重可以做得好啲，但嗰時我先得十六歲，喺嗰時嚟講，我已經盡晒力去做㗎啦。」天佑雖則未獲提名，但他表示絕對看好拍檔，望又南可奪獎錦上添花。
採訪、攝影：朱芷瑩
