美股上周五先升後回，杜指最後僅升6點，收7891。短期形態，杜指以三角形運行，而且接近尾聲，本周應有突破。
睇番美伊嘅局勢，美國想獲聯合國同意出兵相信仍有排拖，局勢不明朗，股市之大忌，所以美股技術上雖未進一步轉壞，但後市仍然唔睇好。
港股上周雖創近期低位9029，但9000關始終跌唔穿，上周五守住9100之上收市，表現其實相當硬淨。上周五歐洲股市造好，但美股有好消息支持亦升唔到，杜指最後僅微升6點，今日對淡友略為有利。
市場今日焦點落在滙豐（005）及恒生（011），兩股收市後公布2002年全年業績。分析員其實睇滙豐業績頗樂觀，估計最多盈利會升26%，另外則憧憬恒生70周年會派特別股息。不過，市場亦普遍憂慮03年香港經濟繼續不景，會拖累滙豐本地業務表現，影響整體盈利。另外以PE及股本回報率計，滙豐現價貴過其他國際大銀行，再加上發新股收購HI，收購完成後所潛在嘅沽壓亦令人關注，因此預計滙豐短期都係易跌難升。恒生則有收購傳聞，或者會影響派息冇市場預期咁高，影響股價表現。如果滙豐及恒生有壓力，港股亦難以有好表現。
早前提過新股科浪（2336）可以認購，今日正式掛牌，抽中新股者要賺一飯兩茶應冇問題，冇貨者亦可伺機上車短炒一轉。另外上周提過嘅高寶綠色（274）整固亦近尾聲，若見向上破位，可伺機短炒。
滙中龍