早陣子，亞Mark曾經同大家披露過，話法國雷諾代理遲吓會將原有個陳列室，搬去靠近灣仔，即原屬日產響禮頓道頭個大陳列室呢！點知新Showroom未及開張，佢哋啲新車就經已急不及待咁到咗香港，但今勻就好出乎亞Mark嘅意料之外，既唔係新款MeganeⅡ，又唔係Espace或Avantime，竟然係較Laguna更高層次同豪華嘅VelSatis。呢部外形跟Avantime有點相近，但就唔係四座位編排，亦無天幕式大天窗配搭，反而會係一款標準五座位嘅豪華轎車；惟車頭布局較前衞，就未必會有咁多用家識得欣賞喇！而率先到港重係一款配備頂級3.5公升V6偈（馬力有245匹，扭力達33.6kgm）型號，車廂鋪排夠豪之餘，佢嘅加速力亦好驚人，0至100公里不過8.3秒咋！若然你有興趣擁有一部咁另類嘅歐洲豪華轎車的話，就不妨落陳列室先睹為快喇！