卜比笠臣被人入屋「老笠」呢件事已經過咗年半，不過佢老人家最近至醒起，當年佢代表英格蘭所得到嗰廿頂喼帽，原來其中十四頂都俾人「老笠」埋，於是近日透過傳媒呼籲個賊或者知情人士聯絡佢。睇見佢七十歲人重拎住剩番啲喼帽作出公開呼籲，都咪話唔淒涼。
呢位紐卡素領隊講明錢財身外物，只希望搵番啲寶貝：「啲喼帽係我球員時代所得到最珍貴嘅嘢，我將佢哋收埋響櫃入面其中一個袋，都唔知點解咁都俾人發現。當我知道失竊後真係輾轉反側，兩晚瞓唔着。」正所謂盜亦有道，老人家將來退休後重要靠數吓呢啲喼帽過吓日辰；斷估啲喼帽又未至於話太值錢，嗰位賊大哥積吓陰德好喎。
拖連奴新教練沙卡利尼一上場就講明想棄用曼寧加，改由老將布基把關。我哋之前都講過呢個奧地利龍門際遇真係幾坎坷，當年響阿仙奴打得唔錯，都長期屈居施文之下；後來借去費倫天拿重衰，見證隊波散班，𠵱家聽沙卡利尼口氣，佢都唔慌會受重用，睇怕又要執包袱繼續浪迹天涯。
前晚皇馬作客大勝艾拉維斯一役，令我求大俠更體會到大球會有財有勢，原來真係可以「以本傷人」。話說皇馬喺比賽末段有後衞希古拉受傷，而三個換人名額已經用晒，教練迪保斯基見領先到五比一，諗都唔諗就叫希古拉出場唔好踢，索性讓對手十個打十一個，認真豪氣！
早前同大家講話「波神」佐敦老馬有火，點知噚日巫師對住公牛，唔熟性嘅路斯重成場波不停trashtalk，搞到波神火到嚟埋。結果？咪出言不遜嘅路斯連牙都俾波神打甩埋囉。賽後路斯重話佢好似聖經故事大衞與歌利亞中嘅大衞咁，不過個巨人就帶埋「架撐」嚟𡁻佢。計我求大俠話呢啲唔夠打就多多嘢講嘅人，正式係禍從口出，一啲都唔抵可憐喇。
巴西中場祖連奴前日一復出就入波，幫米杜士堡迫和愛華頓。咁啱得咁蹺，原來佢上一次代表「米記」出賽係二千年五月，當時對手亦係愛華頓，嗰場波祖連奴亦都有入球幫隊波贏二比○。雖然米杜士堡響聯賽榜排中下游，但祖連奴都出得番，以佢哋人腳話唔定重有機會爭取下屆歐洲足協盃參賽資格。
逢周一至周五見報