國際知名武打影星李連杰主演嘅新片《同盜一擊》，啱啱上個星期五喺美國上映，結果不負眾望，喺開畫首日成功打低對上一周嘅票房冠軍《夜魔俠》，成為票房一哥，單日收咗六百一十萬美元（約四千七百五十八萬港元），成績中規中矩，雖然同啱啱過咗一億美元（約七億八千萬港元）嘅《芝加哥》重有好大距離，但我羅拉覺得李連杰總算對電影公司有個交代。
拍咗唔少西片嘅李連杰，今次又再同佢套舊作《致命英雄》嘅導演安哲巴高域克（AndrzejBartkowiak）合作，唔使諗大家當然都知今次李連杰喺套戲入面又要大顯身手啦，佢扮演一位台灣密探，奉命追查失竊珠寶同綁架案，受害人原來係由美國知名rap友DMX扮演嘅黑幫首領，兩個一正一邪嘅猛男結果合作追捕同一敵人，所以戲名咪叫《同盜一擊》囉！
呢啲動作片有打鬥場面之餘，通常都唔少得加插幾個靚女調劑吓，曾經演過《蠍子王傳奇》嘅胡凱莉，亦喺《同盜一擊》入面扮女殺手，不過睇見李連杰喺戲入面又係着黑衫，似乎啲服裝師懶咗少少喎！