楊思琦同李永豪（前名李泳豪）俾人撞到佢哋兩個拍拖已經唔係第一次，但偏偏每次女方都例牌否認，好似前日下晝四點幾，馮仁昭又喺九龍城撞見佢哋帶埋隻狗行街街，鬼咁溫馨。馮仁昭睇住佢哋不時喁喁細語，永豪拖吓狗仔又拖吓楊思琦手仔，跟住走咗去福佬村道嘅寵物店shopping，不過行咗幾間都冇乜收穫。
楊思琦同李永豪行咗一陣之後，就帶埋隻狗仔去澳門樂園茶餐廳歎下午茶，佢哋揀咗茶餐廳最入嘅位嚟坐，永豪重不時望住大門口，留意街上嘅情況，表現得好小心謹慎。
佢哋喺茶餐廳逗留咗半個鐘就離開，唔使多講梗係由李永豪埋單找數。馮仁昭走上前同佢哋打招呼，點知佢哋個樣好鬼愕然。馮仁昭笑佢哋拍拖行街街，但思琦例牌否認話：「佢陪我放狗之嘛，我哋冇拖手呀。」既然佢都重要死撐，馮仁昭都冇嘢好講。
容祖兒噚日喺旺角Neway卡拉OK出席加盟儀式記者會，祖兒爬上十呎高台簽名，吸引近三百人圍觀。祖兒因為參加BigEcho歌唱比賽而成為歌手，BigEcho老闆娘Apple對佢好好，重介紹佢簽約英皇，祖兒亦愈唱愈紅。點知祖兒𠵱家簽約第二間卡拉OK，Apple傷心到喊，噚日祖兒就話：「我係被動身份，決策嘅嘢由公司決定。我同Apple姐識咗八年，感情好好，我都同佢講話有嘢要幫手可以隨時開聲。」
二人組合Boy'Z噚日喺屯門幫壽司店剪綵，吸引近百歌迷聚集，Kenny同Steven重親手做壽司請現場歌迷食。對於今次幫壽司店剪綵，佢哋否認頂替師姐Twins，佢哋話：「我哋之後會同Twins一齊拍廣告。」
方力申（Alex）噚日喺旺角出席宣傳活動時，對於有報道話蕭正楠因人氣夠，所以俾無綫監製睇中，取替方力申接拍無綫新劇《綠水英雌》，Alex就謙虛咁話：「我都有睇報道，其實因為我要準備考試，而且我個人比較靜唔代表冇人氣，呢行係圓嘅，第二時都有機會合作嘅，呢啲聽過就算。」
何超儀同男友陳子聰噚日情侶檔去灣仔賀詠春江志強拳術總會開張，重拜江師傅為師學詠春拳。何超儀接受訪問話：「其實我學咗年幾但冇正式拜師，𠵱家咪正式做入室弟子囉。」超儀又話：「我學咗之後皮膚都好啲，之前拍《千機變》有好多打戲，雖然導演有畀替身我，但每場打戲我都會學識晒啲動作。」
古天樂噚日去咗台北，為佢設計嘅太陽眼鏡系列ZeroX做宣傳。個眼鏡活動請咗台灣著名主持黃嘉千做司儀，因為對方曾經喺電視向古仔公開示愛，古仔今次見到佢就特別客氣，古仔用國語話：「我覺得她不可思議，香港沒有女孩會在電視上公然示愛，連我爸媽都說她好熱情。」
