巴塞隆拿申請參加圖圖盃？呢個消息堅過石堅，事關佢哋驚參加唔到來屆歐冠盃或歐洲足協盃，𠵱家畀錢報定名踢圖圖盃，實行有備無患。
圖圖盃係啲乜，簡單啲講即係足協盃外圍賽，最後贏咗嗰三隊可以參加足協盃第一圈。由於呢個盃喺六月尾、七月頭就開始打，兼且要踢成三、四圈，講真真係幾難頂，所以列斯、維拉及富咸寧願博喺季尾打入前六名，都咪搞。
之但係，堂堂西甲超級大會巴塞隆拿就唔係咁諗。佢哋最近雖然回勇，重由中下游位置升番上第八位，但為咗穩陣起見，竟然報名參加呢個豬頭骨盃賽。
巴塞最近好弗，喺歐冠盃大數國際米蘭，而喺西甲聯兩連贏，但𠵱家咁樣做，明顯睇到佢哋對自己前景冇乜信心。我求大俠都好明白巴塞咁做係當買個保險，但若然連佢哋都對自己冇信心，球迷點信佢哋呀！今晚佢哋嘅對手奧沙辛拿雖然實力一般，但作客巴塞既然有啲咁嘅舉動，加上傷兵多，球迷要捧就小注好啦！
喺西甲聯搵食嘅門將今屆唔知行乜衰運，季初有拉科魯尼亞嘅西班牙門將摩連拿生睪丸癌，醫咗幾個月先可以復出；喺日前，馬德里體育會嘅阿根廷門將貝高斯被證實生腎癌要暫別球場。馬體會班球員聽到咁嘅消息，心情難免受到影響，睇嚟今晚對馬拉加都係失分多。
祖雲達斯今晚會喺主場大戰國際米蘭，聽講呢場波嘅執法球證柏達斯達，對國米非常之唔老利。話說國米上屆喺奧林匹高球場輸畀拉素二比四，就係呢個球證執法。加埋國米過去十年喺祖記主場未贏過波，重要輸多和少，唔怪得知我哋名家青蛙仔繼續捧祖記場啦！
早排因態度唔好同玩失蹤而被阿積士教練朗奴高文雪藏嘅首席射手美度，喺上星期三對阿仙奴場歐冠盃獲得解凍，但點知唔夠三日又畀人雪番，重話雪到季尾。荷甲聯水準唔高，朗奴高文未必使用到美度；我求大俠唔排除朗奴高文踢歐冠盃時又會喺個雪櫃攞番佢出嚟！
「鐵人」後衞希比亞就話希望喺足協盃八強對住蘇超球隊些路迪時，對方個前鋒拿臣可以趕及傷愈復出，重話好期待可以挑戰呢類高質素前鋒。喂喂喂，今晚聯賽盃曼聯都有個雲尼斯達羅噃，你希比亞咁講，唔係當雲尼斯達羅冇到咁型呀？
前晚我求大俠發現，唔少莊家開咗紐約人主場對近期好弗嘅魔術讓兩分嘅盤口，筍盤當前當然馬上捧場，點知事後先至發覺自己上咗當。原來噚日半場時紐約人為老大哥伊榮舉行球衣榮休，佢哋當然唔衰得，班球員搏晒命要贏波，終於打到第二次加時打抵魔術。呢個故事教訓我哋賽前要做足功課，莊家唔會開筍盤益你㗎！